يالله يارازق عباد محاويج *&* من فيض جودك يارفيع الدراجي

اخواني واحبابي اعضاء هذا المنتدى الانيق اقدم لكم هذه القصيده وهي موجهة الى الشاعر عبيد الشبيلي الاكلبي ... وهي تعبر عن نفسها .ارجواان تحوز على استحسانكم وانا وصدري متسع لاي نقد ايا كان...






يالله يارازق عباد محاويج *&* من فيض جودك يارفيع الدراجي


تجعل لقلبي من همومه تفاريج *&* اللي نهج درب الهموم انتهاجي


لولا مخاوى اهل الوجيه المباليج *&* يمكن يجيب اجلي تكدر مزاجي


لو كان مالي حاجة في المناهيج *&* اروح لااطراف الميادين واجي


بو سعيد ياشوق الصبايا العماهيج *&* يامنومس العاني طليق الحجاجي


يانسل قوم يعدلون التعاويج *&* مثل البحر لااصطك موجه وهاجي


اكلب معنين الخيول المساريج *&* لاما بدا السبار روس المحاجي


كيات قلبي يالشبيلي مناضيج *&* نضج الرهيه لا استوت فوق صاجي


وضغط الليالي بنج الروح تبنيج *&* لولا رجا الله قلت ماله علاجي


الصدر مرسى والطواري بواريج *&* والدرب طايل والمسالك عواجي


وشرح الوضع لمقدرين الاشاميج *&* يكسر عن اسجون الهموم السياجي (الاشاميج تعني الاصحاب )


درّج جميلات الطواريق تدريج *&* بهـرج يـخلي غـارق الـهم ناجي


شعرك لقاله من حـلاوته ترويج *&* مالحقه من الناقـديـن احتجاجي


واسلم وسلم يا وسـيع المخاريج *&* لااصبح ضعـيف الجـهد ماله خراجي





وسلامتكم








اخوكم /عبدالله

صــــــــــح لســــــانك


الغالي / ابو هادي

الله لايهينك وبيض الله وجهك على هذي

القصيده الرائعه واتمنى من الله ان

يداوي جروحنا وجروحك ويصك باب كل

عدو ودمت بخير.

الاخ عبدالله

سلمت والله لايهينك على هالقصيدة الجميلة











وفي انتظار رد الشبيلي














صح لسانك يابوهادي

الأخ الحبيب عبد الله الشهراني

صح لسانك على هذه القصيدة العصماء..وما يحتاج ياعبدالله انت شاعر من الشعراء الرائعين .سلمت

الشاعر / عبدالله الشهراني

مساءك عسل بدون مجامله القصيده غايه في الروعه والابداع

بس لي تحفظ علىالبيت الخامس

مانت ملاحظ انك اقحمت ( بوسعيد ) عنوه في البيت يعني وش فيها لو قلت ياعبيد

اخي عبدالله اقسم بالله العظيم لااقصد من ذلك تقليل شاعريتك التي ليست في حاجه الى شهادة واحد مثلي توه سنه اولى روضه في الشعر لكن هو رأي شخصي بحت
والاختلاف في الراي لايفسد للود قضيه

وشاعريتك لايختلف عليها اثنين

شاكر لك اخي رحابة صدرك

اخوى الشاعر عبد الله الشهرانى...........صح لسانك ولا نتوقع من الشاعر الجزل الا الجزاله.

دمت بكل خير.

ارحب يابوناصر

مرحبا الاف عداد من حج بيت الله وطاف

شرفتني طال عمرك بكلماتك الراقيه ومشاعرك النبيله




تسلم وتبقى

ابو حزام تسلم طال عمرك

ولو ان شهادة الاخ لاخوه مجروحه لكن فخور بكلامك







تسلم ولاعدمتك

جابر السلمي

ممنون والله لدخول شاعر كبير مثلك وتعليقه على الابيات ولا يجي من الطيب الا طيب





اخوك/عبدالله

ابو سجود الله يحييك ياطويل العمر

بالعكس كلامك وجيه وياليت كل من دخل يعلق يقول ملاحضه .وانا تاكد ان صدري متسع لاي ملاحضه.يااخي احد يشوف العرايس الحلوين سجود واخوانها ويزعل(الله يخليك لهم)

وبالنسبه للبيت يمكن قراءته تختلف عن نطقه بحيث ان مافيه الف قدام ابو سعيد لكن نقولها بلهجتنا
ثانيا اسمه عبيد بتشديد الياء وليس عبيد.


على كل الله يوفقك على ملاحضتك وياليت كل ما شفت قصيده لي تبدي رايك بصراحه





اخوك/عبدالله

لاهنت يامطر

وان كان ماالله ثم راعي الرفايع....الخ


لازالت بيوت قصيدتك في داخل الذاكره

اشكرك على كلامك الطيب





اخوك/عبدالله

عبداللة ابن هادى

لاتستغرب ردى المتاخر على القصيدة ومع انها كانت فى شهر ابريل 24 ولكن ان المسالة وما فيها انى اتصفح جميع الصفحات لقراءة جميع قصائدك القديمة والجديدة...كلها قمة وتستاهل الناموس عليها يابو هادى.....واللة ماهى مجاملة واللة اللى يدرى بالنية.......


تقبل اعجابى واحترامى.


الشريفى