Tweet
الأخ سعد القريشي
رأيته من بعد فهبته وعرفته عن قرب فأحببته
اواصله ببعض الأبيات في هذه العجاله وليست بالمستوا المطلوب ولكنها منم باب تجديد وصل للشاعر سعد القريشي (ابيات كيبورد لا تواخذونها)
( يــــــاســـــعــــــــــد)
يا سعد ياشوق غروٍ يرخي القرن الذلاقي * واصلٍ وركه ويزها بالعشاريق العلايق
أدعجٍ ما جر ميلٍ في وسيعات الحداقي * كحل ربي في عيونه عن سواد الميل فايق
طالت الطرقه وحنّا في طريقٍ ما يطاقي * عيّف الحادي شداده فوق الاكوار العرايق
فياسعد كان الركايب نوّخت ويش انت هاقي * لو مدا مقطاع دلّه شف الارواح الطلايق
دامنا في جال واديٍ لو تعسّه ما تلاقي * غير صيدٍ ما حدٍ قد روّعه يملا الشقايق
هات فلاّت الحجاج اللي لفلاّته يتاقي * وساعة البسط اغتنمها لو مدا خمسة دقايق
عقبها بعطيك علمي والهواجيس السواقي * تسقي الظامي بيوتٍ من عجيبات الطرايق
فيه من زينات الايام القديمات العتاقي * والعزاوي والمطايا والعمايم والذلايق
كيف راحت ما بقا منها لنا ياخوك باقي * كون ذكرا قايمه بعلومها بين الخلايق
يا سعد ذيك المناظر مابها زود اشتياقي * شاقني فعل الرجال اللي بها مثل الوثايق
الشجاعه والوفا والطيب وتشريع الرواقي * دون ضيفٍ ما تعوقه عن مجالسهم عوايق
والله انّي يا سعد ما عاد اعيّن في نطاقي * في زمنّا من فعول الطيبين الا شلايق
صارت علوم الفخر قولت(هلالي) و (اتفاقي) * من دعيته للظفر قال اعفني مانيب رايق
همّهم جا في الثياب وفي غترهم والطواقي * يا عسا من تشغله عن طيب جدّه للحرايق
يا سعد شد الركاب وجنّب القلب الفتاقي * سوقها غيّرت رايي ما يبي المقعاد ضايق
خلنا نصى بها رجمٍ يسلّي كل راقي * مجلسٍ في طارف الوادي ترا ماهوب لايق
وسلامتكم
خوي المطاليق
تعليق