أنين المنابر في وداع الشيخ جابر

[align=center]


في هذا الموضوع سوف نجمع كل المرثيات التي قالها شعراء النداوي في

فقيد العروبه والإسلام أمير القلوب الشيخ : " جابر الصباح" ...


والرجاء تزويدي بروابط النصوص التي لم أضعها هنا وانا اضيفها او إضافتها من قبلكم حتى نحصر النصوص في موضوع واحد...

رحم الله الشيخ جابر الصباح رحمة واسعه وجعل مثواه جنات النعيم

[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]

البقا للله والراحل فقيده= والفقيده كل مخلوقٍ درابه
جابر اللي يمسح الدمعات بيده= عن عيون الشعب مهديهم شبابه
همه ان الناس بالدنيا سعيده=لين خلا شعبه الوافي قرابه
يرحمه رب السما محصي عبيده= الله اللي حطله قدر ومهابه
في قلوب الناس والدم ووريده= اخو مريم ساس منهين الطلابه
بالكويت ونجد وديارٍ بعيده =تبكي اللي بالوفاء ماصك بابه
رحمتك يامحيي اعضامٍ هميده = تجعله بالخلد بديار الصحابه

فازع الرشيدي
[/poet]


[align=center]================[/align]


[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
جنّبت لكن ماعن الحزن مجناب = كنّ الحزن منسوج داخل مَعَمّي
وانا من اول ماحسب لحزني حساب = لو كان مابه هم ويفوق همّي
وياجفن عيني شرّع لدمعي الباب = يمكن يخفّف بعض همّي وغمّي
ولاتنحرج لامن غدا الدمع سكّاب = وشافك بعيد الحيّ والا ابن عمّي
واليا نشدك اشرح له وقلّه اسباب = همّك ومااسْرع مابكا واستهمّي
لَنّ الفقيده غير من غُرْب واقراب = ومحبته في كل قلبٍ تعمّي
ولو آصفه بكتاب وكتاب وكتاب = جفّ القلم واحتار تعبير فمّي
هذاك جابر شوق تلعات الارقاب = حاكم حكيم وبال***** ملِمّي
رمزالوفا و الطيب فكاك الانشاب = سقم الحريب اللي يدينه تخمّي
لاجا نهارٍ فيه تحتار الالباب = يسقي عدوّه كاس علقم وسِمّي
لبّس كويته بالفخر كل جلباب = وامّن بها مواطن وسايح وذمّي
عنّا رحَل ووالموت مَضْرِبْه لاصاب = ماهوب لايخطي ولاهو يِزِمّي
امقدّره منزل تبارك والاحزاب = ربٍّ بإسْمه كلّ خلقه تسَمّي
آمنت به وبماقضى رب الارباب = وادعيه يكشف همّي المدلهمّي
وياشعر في ماقفك لاصار غصّاب = تعال ياراع المواجيب يَمّي
وعزّ الكويت ديار عربين الانساب = دارٍ غلاها في شرايين دمّي
وعزّ الثلاث ابراج مع عالي اطناب = قصرٍ بدسمان الشموخ متسَمّي
وعزّ العروبه فيه في كلّ الاقطار = وعزّ الملوك وكل شخصٍ مهمّي
وعزّ الشعوب المسلمه حضر واعراب = وعزّ الخليج وموج بحرٍ مطِمّي
وعزّ الخيول الصفر وسيوف وحراب = اللي بدمّ المعتدي تِسْتحمّي
وانا عزايه فيه من عقب ماغاب = حبٍّ تبعثره الضلوع وتلمّي
يبقى بصدري عالي اركان واطناب = ويكفي غلاه وشعبه بجوف دمّي
*****
(( محمد القثامي ))
[/poet]


[align=center]================[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]


ياعلم رفرف ترا مامات جابر

.......... حي بارواح ٍ تضمه في جسدها

ياعلم صيته علي روس المنابر

.......... من عرف سيرة ابو مبارك حمدها

رِفعت الاقلام وارتفعت محابر

.......... حي ذكره لوتوسط في لحدها

ياعلم وش انت عن هالشيخ خابر

......... سولفه للي خفا علومك نشدها

جابر العثرات للعثرات جابر

......... وقفته تِعرف ولايحصي عددها

رمز عزتنا وحنّا به انكابر

......... مانست هالارض لِه سجده سجدها

مدّته للطيب ماتِشبر بشابر

......... انشد كفوف تغذّت من رغدها

الارامل واليتيم وكل عابر

......... والعجوز اللي تنكّرها ولدها

والفقير اللي علي اللوعات صابر

......... وكل منهو يشتكي ضيقة نكدها

والبلاد اللي عليها العوز ثابر

......... والشعوب اللي تشكيّ من لهدها


ويوم ضاق الشعب في كل المعابر

.......... مد كفين العطا وكل ٍ شهدها

وراح يركض من ورا داره يثابر

......... لين رد الدار واوفي في وعدها

والكويت بعهد جابر بنت اكابر

......... شامخه والمجد تلعب بّه بيدها

مجدها لاِمع ماتعشق مجد غابر

.......... سطّر التاريخ باسطورة بلدها

ياالاهي رحمتك للشيخ جابر

........ ياوسيع المغفره بِيدك مددها

ياعظيم الشان عفوك في المقابر

........ يوم ضمت جابر الخير بلحدها


.
.
.

صالح مصلح الحربي
[/poet]
.


[align=center]================[/align]


[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
طاش فكري والقصيد المر عيا=يكتب من الحزن لافاضت عيوني

طاوي ٍ قلبي رحيل الشيخ طيا=ولايفيد القول أو تغيير لوني

الأمير اللي على عرشة تفيا=ما غفى بالظلم مكحول العيوني

بالعطا والطيب حايز للثريا=ولاوفيت رثاه في صافي فنوني

مكرم ٍ للجار مايبديه سيا=صادح ٍ بالحق همّال المزوني

والله الي مرسل محمد نبيا=وافي ٍ بالحكم عدل ٍ مايخوني

شيخنا الي يتبع الضميان ريا=والأرامل تحت ظل ٍ به سكوني

الخبر يكوي صميم القلب كيا=ياهلي تكفون في دفنه خذوني

***

تاج الحلا
[/poet]

[align=center]================[/align]




[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]

ياليتني فجر ( الاحد ) ماتوعيت = ولاشفت في ( دسمان ) حزن المنابر

قالو توفى ! قلت : انا اللي توفيت = القلب يبكي والمحاجر .. تكابر

مدري عقب جابر ؟ اعزيـك ياكويت= ولا اعزي طفل .. ماشاف جابر

ابو اليتاما .. راعي الجود والصيت = مقدم رجال العز .. مجد الاكابر

الطيـٌـب اللي في كل قلب ٍ بنى بيت = وقت ٍ ماعاده فيه ! ذا وقت غابر

ماتنسي يابومبارك لاطريت = في سيرتك جابر وللكسر جابر

ياشعب يومك في وجوده تهنيت = اليوم ؟ عقب الشيخ ! وشلون صابر ؟

جابر بيبقى حي .. حتى ! وهو ميت = مدام مشهد ضحكته له مخابر

يالوالد اللي من حنانك تقهويت = محال يرثيك الشعر والمحابر

ليتك قبل مامت شفت وتحريت = ناس ٍ بكت دفنك .. جموع وطوابر

ياقبر لو انك تعرفه تمنيت = ما ينهري طاهر مثل جسم جابر

لو العمر يهدى يابومبارك اهديت = عمري وعمر اخواني اللي تثابر

الموت عابر ان رضيته وعييت = الا انت موتك شي .. ماهو بعابر

من اول ٍ ! ياحظنا بقربك ان جيت = والحين في قربك .. ياحظ المقابر

مـابـه مـحـال بـذا الـزمـن شـي يـاكـويـت = الا انــه ؟ يـنـجـب واحـد ٍ مـثـل جـابـر

سعود بن مهدي
[/poet]



[align=center]================[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
هيه يا من يفقدك جارك و دارك=حاضرٍ بقلوبنا يا ابو مبارك

وصّلوا مني رساله للكويت=شب يا قلبي من الأضلاع نارك

لعنبوا ساس القوافي و القصيد=كان ما شاركت في مأساة جارك

يا حبيب الشعب يا عز الخليج=يا نظيف القلب و البسمه شعارك

لو تغيب سنين تذكرك السنين=كل نجم لاح ما يلحق مدارك

في قلوب اهل الجزيره و الخليج=كل دار صابها ما صاب دارك

لاعنا ما لاع ابو متعب و اخوه= ابو فيصل ماخذ ثاره و ثارك

نشتكي لله علام الغيوب=كيف لا جاء العيد نفرح او نبارك

كيف فبراير يجي ألفين و سته=كيف لامن طال وقته بإنتظارك

كيف لامن هلت دموع اليتامى=كيف لامن ما لقينا من نشارك

ما نوفي قيمتك يا ابن الشيوخ=يا عسى الفردوس يا جابر قرارك

و الله ان تبقى الكويت(كويت حرّه) =لو تقوم ام المعارك والمعارك


عبدالله الدوسري
[/poet]



[align=center]================[/align]




[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
وقع ذاك الخبر ياناس زعزع كـل مافينـي = فجر يوم الاحد قالو خبـر عاجـل وتتليهـا

وفات الشيخ جابر ثم حارت دمعتـي بعينـي =وصارت فيني الدنيـا عجيبـه بكـل مافيهـا

قعدت وشفت انا المنظر على الشاشه يناديني =وقمت وقلت ياربي عسـى جذبـه نمشيهـا

ولكن للاسف دمعـي تناثـر فـوق كفينـي = وصدقت الدموع اللي من امواقـي اسريهـا

أعزيكـم وواسيكـم وانـا منهـو يعزينـي = منو يقدر يعزي عيني اللـي غـاب غاليهـا

الاياجابر العثـرات تكفـى شـوف يدينـي = تراجف خوف من بعدك وبعدك منهو يعطيها

ترى بعدك يامير الحب خفت كـل موازينـي = وترى بعدك كويت الحب هزت كل مبانيهـا

وترى بعدك انا عطشان ومدري منهو يرويني = وترى بعدك هذيك الارض دارت من حواليها

خساره موتتك ياشيخ لكـن موئمـن بدينـي =واعرف انه امر ربي جموع الحشد يحصيها

عسا ربي من انهاره سقـاك وحبـة التينـي = يخليها ثمـارك وسـط جنـات الله حاميهـا


عمر اللهيميد
[/poet]



[align=center]================[/align]

[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
حل الفراق وهلت دموع الاعيان=تفجري فوق الورق يالمحابر
جات الدموع تقول: ذا موعدي حان=وانا على العبرات ما احتال اكابر
ماشفت في فرقا حكومه وشيخان=فرقاً مثل فرقاك يالشيخ جابر
كن الحزن ليلٍ كسا قصر دسمان=وكن الفرح شيخٍ خذته المقابر
عليك هل الدمع ياطير حوران=محدٍ على فرقاك ياشيخ صابر
تبكي الكويت جموع بدوٍ وحضران=وتبكي عقب فرقاك كل المنابر
ياغيث فقرانٍ وياعز يتمان=رجل المظاهر غير رجل المخابر
للشعب عون وللمروات عنوان=للطيب منباعٍ وللكسر جابر
تاريخك ابيض فاح مسكٍ وريحان=ماهوب تاريخٍ مع الوقت عابر
ياشيخ جابر رحت واهديت الاحزان=حتى غدت الاحزان مثل العنابر
مرحوم ياشيخ المروه والاحسان=الله يبيحك ياوريث الاكابر

ماضي العضيمان
[/poet]



[align=center]================[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
مفروض ما ارثيك بحروفي وكتابي=مفروض أرثي الناس ياشيخ جــابر

ما أقول ضاقت من فراقك ثيابي=أقول ضاق الكــون والكل خــابر

قدام موتك امنياتي بشبابي=أفرح واعيش بقصر مثل الاكابر

ومن بعد موتك يارفيع الجنابي=صرت آتمنى مسكني في المقابر

ان قلت فيك آشوف أعذب شرابي=تشهد على قولي جميع المنابر

في عينك اليمنى حقيقة سرابي=وفي عينك اليسرى أصول المخابر

رحلت وأدمت رحلتك ضحك نابي=لامابقى بعدك لــ هالضحك دابر

انا قبل ما كنت أصدّق عذابي=يومه يهددني بشيــب الصــوابر

كنت اتهزّآ فيه ما أحدٍ درابي=اقول له حزنك على القلب عابر

لكن بعد جابر انشهد سطــابي=وادري بعد ماغبت ماني بصابر

ياشيخ كيف آحث يمّك ركابي=بس دلني واجيك والله لــ أثابر

حبّك لبسني مثل لبسي ثيابي=احيان أغلط بسمي .. أقول جابر

بدر بن غازي
[/poet]



[align=center]================[/align]




[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
وانا أزمل حزني وخافقي دار=وأقول نام أبغى فرح بسّ ساعه
ثار بخفوقي حزن (ماقط) بي ثار=حتى بعيني بان ليّ إلتياعه
سألت ياحزني (سلاماااات وش صار)؟=وردّ بألم بحري غرق به شراعه
يابدر .. رمز الطيب خذته الأقدار=يابدرِ مات آبو الكرم والشجاعه
وشلون تفرح والفرح كنّه النار=مدام جابر منه وخذت وداعه
رديت.. زدني حزن ياحزن وإختار=كل عضو أحْزِنْه ولدي استطاعه
ياويل قلبي كل ما أملكه فار=كنّ الزمن كذبه وقلبي إشاعه
ياكــسر ظهري هالخبر غير الأخبار=كني رضيعٍ وأحرموووه الرضاعه
كن البشر مجنونه وقلبي شهــار=والله بلشت بموقفي وإنطباعه
ماجفّ دمعي عن فهد رغم الإصرار=للحين في صدري تعاوي سباعه
واليوم جابر والنفس بعدهم (حار)=وشلون بتنفس وهمّي الشفاعه
جرحتني ياوقت والحول مادار=وزدت الجروح جروح جرحٍ ذراعه
أطول من أطول شئ تبْصره الأنضار=وأصعب من اللي صعب يقبل قناعه
ياشيخ دربٍ مامشيت إبه غدّار=ياشيخ وصلٍ ماوصلته .. قطاعه
ماهو غريب تموت بك حتى الأقدار=كلٍ يحبّك بإقتناع وبراعه
ياشيخ تبكيك المعاني والأشعار=ويبكيك عزّ أنته زرعته زراعه
ياللي حفظت عهود شعب وعَهَد جار=ومن ما يطيع بطيب بيطيع راعه
ياللي ألاف الناس تفديك الأعمار=من قبل ترحل أو بعد (سمع طاعه)
دار الخليج تنوح وتنوح الأسوار=وياعيني إبكي له وهيني المناعه
ياحزني إسكنّي وقلبي لك الدار=إعبث بقلبٍ هم فرقاه لاعه
وان كان حزن إموادعك بي ماثار=يالله عسى ما آعيش لو ربع ساعه

بدر بن غازي
[/poet]






[align=center]================[/align]



.



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
أهل الكُويت أفواج في قصر دسمان=فعيونهم لهفه وحسره وتخمين

ذاع الخبر ياليت راعيه غلطان=رحل حبيب الأمّه سنين وسنين

غم وألم واجراح وهموم وأحزان=القلب شعلة نار .. والدّمع في العين

مات الأمير , الوالد, الحر, الانسان=يبكيه شعبه والوطن والملايين

مات الزعيم اللي له العز عنوان=شمعة وطنّا والعرب والمسلْمين

( جابر الأحمد ) شان .. من مالهم شان=أبو اليتامى والضّعوف المساكين

معروف في المعروف .. واحسانه احسان=يمناه بيرق جود في العسر واللين

عطاه غيث يحوّل الجرد ريضان=حدود خيراته من الصين للصين

من دون حق الشعب مخلب ونيبان=ومن دون حد الدار شلفا وسكّين

قايد وفي حكمته للعدل ميزان =حق المواطن كاش .. ماياخذه دين

حصان وبن حصان وربوّة حصان=عزيز مايرضى الاهانه ولايهين

لاضاق صدر الشعب يظهر كحيلان=ماينشرح صدره وشعبه حزينين

مايشرب من العد لو كان ضميان=الين يسقي اللي على العد شفقين

الله يجعل قبره جنان في جنان=قلته ودمع العين في محجر العين


فهد بن عبدان
[/poet]




[align=center]================[/align]

[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]


القريحة جريحة والمعاني تعاني=كيف تقوى حروف الشعر تنعى الأمير

كيف يكتب بناني كيف ينطق لساني=كيف أوصف شعوري بالمصاب الكبير

يوم حزني بفقده هزني واحتواني=وأظلم الجو في عز النهار المنير

القدر بــه رضينا وكل هالخلق فاني=ولو يغيب عنا جابر باقي في الضمير

ربي إجعل مقره في فسيح الجنانِ=وياالله إجزه عن الشعب الكويتي بخير

سعود فهاد العتيبي

[/poet]



[align=center]================[/align]


[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
سافري بالرساله ياهبوب الرياح = من شفاشيف نجد وناحري للكويت
دام حمل الرساله يالهبايب متاح= وصليها وقولي كلفوني وجيت
القنوات شفنا بثها فى الصباح = والبيان الاميري من سمعته دريت
مات جابر حبيب الشعب جعله مباح = ابوالايتام نور الدار في كل بيت
مات امير القلوب المثخنه بالجراح = مايفيد البكا يالادامي لو بكيت
مات امير الكويت اللي عمرها وراح = بعد صارت بلادٍ مثلها مالقيت
دون شعبه قضى طيلة حياته كفاح = مايدور بها بين المخاليق صيت
وقفته يوم صار الغزو والاجتياح = وقفة الفارس اللي دونها مستميت
الهم الله هله بالصبر والارتياح = وغفر الله ذنوبه كلها كمبليت
باسم شعب الخليج نعزي ال الصباح = وكل شعب الكويت اللي من الغبن ميت
وعمر الله حياتك ياسعد بالنجاح = في قيادة بلادٍ في كنفها ربيت
انتم اخوان مريم ياصقور الفلاح = اسرةٍ مايفوز بقربها الا البخيت
وفى النهايه عسى جابر مع هل الصلاح = واحسن الله عزاكم فيه ياهل الكويت

هاجد بن جايد العتيبي
[/poet]


[align=center]================[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
الله وأكبر يا قدر لو تماديت=مؤمن بربي والمقادير قشرا

فجعة كبيرة وقعها ما تمنيت=لا شك حكم الله مخطط ويقرا

يوم الخبر جاني نهضت وتعزويت=أكابد الأوجاع والنفس طفرا

وأخذت لي ساعات ما عاد أنا أوحيت=من كان حولي فيه ما عدت أنا أدرا

عودت أكبر ثم أهلل وصليت=سجدت للرحمن وأدعيه جهرا

مرحوم يا شيخٍ من الحب خطيت=في قلوبنا ما خذ مكان ومقرا

تحت الثرى لو ودعوك وتواريت=بأفكارنا تبقى لك اليوم ذكرا

محبتك من كل شعبك تلقيت=طفلٍ صغير وشيخ بسمك تهذرا

غرست فينا حبك وغصب صبيت=وسط الصدور محبتك ما تعرا

منزلك من فوق السحابة تعليت=طوعتنا بالحب من دون عسرا

رمز التواضع طيب الذكر والصيت=والسيرة العطرة لمثلك تحرى

أميرنا اللي بالمحبة توليت=ولايتك ما جات غصبٍ وجبرا

كل البلد تنعيك يا من تسميت=بالخير يا جابر على طول تطرى

مرثيتك ما يحتويها ولا بيت=لو بكتب من الشعر مليون سطرا

لا شك من ضيقة بصدري أنا أدنيت=المحبرة وأبا أنثر الشعر نثرا

بكتب قصيدة فيك يا رمز الكويت=بكتب ودمع العين ينهل عبرا

شيخٍ على شعبك من الجود مديت=بحرٍ وفيك المد من دون جزرا

فيك التواضع هال كل الطواغيت=اللي محبتهم على الزيف تضرى

فالذاكرة تبقى صباحي ولمسيت=أمعطره ذكراك مليون ذكرا

في سيدي من لامني لا تباكيت=جعل المرض يفت كبده ما يبرا

يا الله يا اللي فوق عرشك تساويت=تحط له في جنة الخلد قصرا

بدر العجمي
[/poet]


[align=center]================[/align]

[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
لااله الاالعظيم الكريم المستعان= فالج الاصباح قدوس علام الغيوب
احدِ فردِ صمد مامعه فالملك ثان= واهب الارزاق رحمن غفار الذنوب
لاعتراض اب ماكتبه الله الباري وكان= البقا لله والعمر باللوح امحسوب
والمصاب اكبر من الشعر لوسحره بيان=المصيبه جابرالخير وامير القلوب
جابر العثرات سيف العداله والامان=مزبن الشعب الكويتي ليا شبت شبوب
اقتبس رايه من الرأس مايرضا الهوان=دون شعبه رابط الجاش والرأس امعصوب
ماتضايقنا من العسر لوضاق المكان=والبلاوي لا بلينا بها عنا ينوب
احتوانا صدره الرحب يوم الوقت شان=الكريم ابن المكارم وحلال الكروب
انتزع منا الولا بالمحبه والحنان= من صفاته حبه الشعب ماهوب امغصوب
عظم الله اجرنا وسكنك خضر الجنان=يرحمك رب السماوات يامير القلوب

مجعد بن متعب
[/poet]


[align=center]================[/align]



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
خمسة عشر في الحج ياشين ليله = وسته بعد عشرين ياعام الأحزان
فجر الأحد عشنا بهمه وويله = يوم أعلنو فقده وينعاه ديوان
( جابر الأحمد ) فيه نبكي رحيله= وتبكي عليه أمَه وتبكيه بلدان
وتبكي على فراقه سنينٍ طويله= فيها خدم لأرضه ودينه بالاحسان
لو يرجعه دمعٍ ذرفنا هميله= وبدمعنا نسقي فيافي ووديان
حكم القدر لاشك مافيه حيله= لابد جوره تشهده كل الأعيان
راح الفهد ثم راح جابر قفي له= اللي على رووس الزعامات عنوان
مرحوم ياشيخٍ فعوله جليله= أغلى الكويت وعزها كل الأحيان
قدَم جهودٍ مالها من مثيله= تبقى بتاريخ العرب دون نسيان
يارب جابر جاك كرَم نزيله= شيخٍ يحبونه صغارٍ وشيبان
وأكتب له الجنه حياةٍ بديله= وأجعل مقره بين روحٍ وريحان


النــــــــــــــادره
[/poet]



[align=center]================[/align]


[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
نصف الـ(يناير)..نصف(ذيْ الحِجَّه)! دَريَت..أيَّت دريَت؟! =ألاّ فُجَعْت..وزُلزِلَت أرضي..وبرق الهَمّ لاح

في عام ستّه بعد الالفيَن! إنطفى بالكون ليَت! =نَجمٍ ذبَل...وَجه الظلام ارخى لثامه ثُمّ شاح

وبالستّه وعشرين والأربع ميه والألف..(ليَت) = مع (لوّ)..! ماتنفع بَعَد نَشْبَت أظافرها..وطاح

ظلعٍ..سجَد بالأرض وإحظنته وله سمعه وصيِت =وتزيَّنَت به واَخضَرَت به كَنّ كاسيها وشاح


يـ الزاير اللي بالخبر صبح الأحد يَمّي لفيَت =ياخي(صباح الخير) كيف إتقولها؟! أيَّت صباح!

وشهي صباح الخير!..ياللي بـ اسوأ الأخبار جيِت = أستَغفر الله...راح كل الخير مع موت الصباح

غلطان..ياخي قل(معَوَّض خير)..ليتك ماحكيَت =ماتدري إن الصمت بعض احيان مرغوب ومُباح!

يارب لاتكتب عليّ الذنْب..بحماك إلتجيت = إغفر ذنوبٍ خافيه,والبيّنه..منك السماح

اللهُ أكبر..لا إله الاّْ انت يامُحيي,مُميِت = ياحيّ,ياقيّوم,ياعالي..ولادونك سناح

ياواحدٍ تعطي من افضالك..وتاخذ ماعطيَت = وإتبَدّل العُسرى بيُسرى,والكَدَر بالإنشراح

لَك ماعطيَته يارَفيع المنزله..لَك ماخذيَت = لَك كُلّ مانملك..لَنا لطفك,وهديَك,والصلاح


ويامَن تقول(إطلب ياعبدي,واَستمع لك لادعيَت) = ندعيك وايدينا رفعناها..وكلّ الدمع ساح

بقلوب كلّ المُسلمين اللي لبلواهم رضيَت = نطلبك تخفيف الألم..وإتزيح هَمٍّ مايُزاح

ياجابر المكسور,يامَن للمخاليِق إبتليَت = ولازادت البلوى!..تفرّجها وكل الهَمّ راح

إجبر مُصيبتنا بـ (جابر كلّ عثرات الكويت) =الشيخ,والإنسان,والمحبوب,والوَجه السماح

حَبيب شعبه,والخليج,..وبالعرب..حبّه رأيَت =بوجيههم,بـ اصواتهم,بقلوبهم..والسَدّ باح

والمُسلمين بحزنهم! توَحَّدوَ بيَتٍ وبيَت = أعظم تكاتُف,وإتحادٍ للعرب,واقوى سلاح!!!

في موت جابر! عادت الوحده..وفي حزني!..بغيَت! = افرح بوحدَتهُم.. واثَر طعم الحزن سمٍّ ذحاح

موته! رسوب إبـ مدرَسَة كلّ العرب..لكن لقيَت! = إنه..قِدَر حتى بموته..للعرب يصنع نجاح!

نَعَم..وهاذا يَتَّضِح من بعد ماشفت وقريَت! = توَحَّدوَ كلّ العرب..(حزن,وتشابُه بالجِراح)

لله درّك من بَطَل..حتى بموتك إمتطيَت = صهوَة جواد..إتلمّ شملٍ منتثر عبر الرياح


مرحوم يابادي بنخوَه..وإنتهيَت بما بديَت = نخوَه,وطيب,ومجد للبادين من بعْدِك مُتاح

للمُسلمين,ووللعرب جمعاء, وإلـ شعبك بنيَت =أمجاد مشهودَه,ومعهم للفخر تبني صِراح

معْك! إعتلى دَسمان..وانته! فوق دَسمان إعتليَت = ياروح شعبك,قلبه النابض, وياستر الملاح

يالعاهل اللي بالإراده,والعَزيمه.إحتميَت = محبوبة الشعب الخليجي..من عَميلٍ إستَباح

لحدودها..وانته وقفت إلها بعزم..ولاثنيَت = ساقك..ولا طاب إلك زاد ولاطعام ولامراح

وللمعظله شَمَّرت عن ساعِدْك..للحمل إرتكيَت = وكافحْت وانته صامل الزنديَن..يانعم الكِفاح

ينظر لك العالم بعين إعجاب..وشلون إحتويَت = للموقف المُذهِل؟!.. ومن فعلك كسبت الإمتداح

ولاخاب ظنّك في رجالٍ جيت ناصي وإنتخيت =بعروقهم دمّ الحمَيَّا ضَخّ بالفزعه وفاح

معك معك..ياللي (نخيَتك فـ القدايم)..وإعتزيَت = ابشر يـ اخو مريَم..بـ اخو نوره وبقلوبٍ صحاح

دارٍ قديمٍ فضلها..ينساني الله..لونسيَت = (الفزعه البيضا)..وترديد العزاوي,والصياح

ولَجَّوَ بعزوة(جارنا ياعياااال) كلٍّ مستميِت =جار,وفضل سابق.. ولا نجزاه بكفوفٍ شحاح

لين إستقرّت وإستوت لك,وانت للعلم إستويَت = وإعن الوَعر ساويَت هيبتها على الأرض البراح


ويهل الكويت أشعر بتقصيري..ولوّ إني بقيت = اكتب سنَه..عَن ما بداخل مهجتي حزن ونياح

الموقف! اكبر منك يافكري وياهَجسٍ طريَت= مهما تجلَّت صورة التعبير!..مـ اشعر بـ إرتياح

وياشعر..لايمكن توفيِّ لومشيَت ولو عديَت= ترقى جبل شاهِق..ومن عاليِه تُرمى بالرماح


والواجب! انصى الواحد المعبود وإلـ فضله رجيَت= عَدَاد مانودي بـ (حيّا للصلاه,وللفلاح)

إنه يكرِّم جابر الأحمد ويجعل له مبيِت= في جَنَّة الفردوس..ويدلّه على الحوض القراح

ومع المياميِن,الكِرام اهْل البَخَت! يصبح بخيِت= ومع كلّ راعي خيَر فـ الجَنَّه تهنّا وإستراح

ندعي ياجابر كلّنا: جعلك تلاقي مـ اشتهيَت= ويظلّك اللْه تحت ظِلِّه في نهار الإجتياح

آمين رَدّدها معي ياللي لوَجه الله نصيَت= يرحم,ويغفر..للفقيد اللي عليه القلب ناح

وتبقى الكويَت بعزّها ياللي بَعَد جابر وَليَت=أكفأ خَلَف,لـ اعظم سَلَف.. يبدا مسيره وإفتتاح

وإكمال منهَج عزّ..يامَن سِرت بالركب ومشيَت=نعم القياده,والوَطَن,والشعب..رفرف ياجناح


وإختامها! ظلعٍ سجَد بالأرض له هيَبه وصيِت= وتزيَّنَت بالقبر..يَكسي صدرها مثل الوشاح

وشعب السعوديه! يعزّي بالحزن شعب الكويت = وكلمة(صباح الخير)!..اعزّيها بعد مات الصباح


عبدالرزاق الذيابي
[/poet]


[align=center]================[/align]

الله لايهينك يابو ناصر


راعي علم غانم

[align=center]الله لايهينك يابو ناصر
.
.
علمك غانم داايم
.
والله يجزاك بالخير
.
والله يرحم الشيخ الفقيد ( جابر الاحمد )
.
وتمنياتي لك بالتوافيق
.

سالم الوهبي[/align]

[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
من كبر ماصاب الكويت وصابني ماني بخير=واااااحر قلـــــبي خانـّي التعبير ولله الكــــــمـــــال

عزيت شعبي في الوفاه وكل حي ٍ لــه مصير=لان العـــزاء في كل بيت ٍ من جنوب ومن شمـــال

الحزن أشوفه في عيون الرجل والطفل الصغير=ثــوب الحداد اللي كسا الديره بكى من سوؤ حال

وروح الشهيد..وموكب الأبطال..ورفات الأسير=حتى ، تراب الدار وموج البحر. وصخور الجبـال

ونجم الثريا. والجدي. والشمس ....والبدر المنير =والخير... والتقوى وفعل الخير والمال الحلااال

تبكي بحرقة دم فرقا الشيخ وبالدمعٍ الغزير=إغـــــــــرورقت عين الكويت وسالت دموع الرجال

وحزن المآذن ينعي الزاهد بأصوات النذير=صوته يبـكـّي الروح وأشجي القلب من قل ّ الوصـال

لله درك ياكفوف الخير ياكفوف الأمـــــير=غيث وسحابة خير كف الشيخ جابر طيب فــــــــــــال

يا والد الشعب الحنون الشهم يالقلب الكبير=يا وجه خير وفـــال خير وذكـــر خير ٍ مـايــــــــــــزال

يا خالد ٍ في صفحة التاريخ يالصعب اليسير=اسمك نقشه الشعب من ماء الذهب أكــبـــر مثـــــــــال

يافارس الحكمه وسيف الحق يالراي البصير=ياأعـدل من الميزان والقسطاس يالــحكم الــــعـدال

ياأشجع من رموز الشجاعه للوغى سيف ٍ شطير=يا معرب الجدين نسل الجود أعمام وخـــــــــــوال

يا متعب الحكام من بعدك بإحكام الضمير=يا مشرك ٍ شعبك بحــكمك والحكم فـــــعــــل ومــــقــــال

حضارة الدوله ونهضة شعبها وخط المسير=رسمتــــها ونــــفــذتها بحنكه وبــاس وراس مــــــــال

يا جنة الله يا كويت العـز يالخير الوفير =يا نعمة الرحمن لا تحصى عدد فاق الخيــــــــــــــــــــــال

عهدك رخا والشعب كله أغتنى مامن فقير=تـقـدم وعـلم ومـنـارة عـلـم .. حـقـقـت الـمـحـــــــــــــــال

زرعت حبك في قلوب الشعب ريحان وعبير=أفـــــنيتها زهـــرة شــبــابــك تبني سنين ٍ طـــوال

فرقاك يا جابر ألم والقلب محزون وكسير=عين الكويت بكبرها تبكي على مـــر الليـــــــــــــــــال

من كبر ماصاب الكويت وصابني ماني بخير=واااااحر قلـــــبي خانـّي التعبير ولله الكــــــمـــــال



عبدالناصر الفهاد


============================================================ ============


الصدر ضايق والمشاعر حزينه=ياكبرها الضيقه وياكبر الاحزان

ألوذ بالله واعبده واستعينه=واعوذ به من وسوسة كل شيطان

لو ماعطانا الله اعقولٍ رزينه=ولوماتزوّدنا بنفحات الايمان

ولومالله الهمنا الصبر والسكينه=ولوماوهبنا الله على الحزن سلوان

يمكن نموت من القهر والغبينه=على وفاتك ياذرى قصر دسمان

جابر الاحمد كلكم خابرينه= عنوان للفزعه وللطيب عنوان

الشامخ اللي عزّته في جبينه=الصامل اللي صهلته صهلة احصان

من قو باسه كن في حاجبينه=ارماح وسيوفٍ محاديب وسنان

يشهد لجوده زحمة مشيعينه= ماهي شهادة كلمة افلان وفلان

واقع وكلن شاف قدام عينه=شعوب تشهد له وقاده وبلدان

وشلون شعبه بالوفامكفنينه=والشعب كله اصبح لجابر اكفان

من لامنا في حبنا الله يهينه= هذا امير قلوبنا بكل ميدان

قلبه مقسّم بين شعبه وبينه=حتى غدى حبه لنا حالة ادمان

عشنا على عطفه ومدة يمينه=فضايله يرجح بها كل ميزان

كن الكرم مخلوق في وسط جينه= انسان لكن غير عن كل انسان

مامات جابرنا ومن قال وينه= قلنافي وسط اقلوبنا عالي الشان

عايش معانا وكلناعايشينه=ذكراه تبقى راسخه وسط الاذهان

كل السعاده عقب موته سجينه=والدار توحش من بعد ذرب الايمان

ياليييييت ربي مد له في سنينه=ولا خذى غيره من الانس والجان

عزالله انا ياعرب فاقدينه=والشعب كله عقب فرقاه خسران

تكفوووون من يسمع فيرفع ايدينه= ويطلب لجابر كل رحمه وغفران




محمد فهد العرجاني
[/poet]

في موت جابر

[poet font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=200% align=center use=ex length=0 char="" num="0,black" filter=""]
الدار تبكي واهـل الـدار يبكـون=حتى غريب الـدار هلـت دموعـه
مالومهم لو فـوق هـذا ينوحـون=بفراق من لا عاد نرجـي رجوعـه
ان مابكت جابر احاسيـس وعيـون=لاخير في قلـبٍ تضمـه ظلوعـه
ليته درى عن حالة الشعب وشلـون=لحظة ورود العلم وشلـون روعـه
شعبٍ خذا منهم عهـد مايخونـون=وهـو عطاشعبـه بنفـسٍ قنوعـه
لين اصبحوا بالشيخ جابر يهتفـون=شعبٍ على الاخلاص تمشي جموعه
في موت جابر كل شعبـه يعـزون=يوم ان جابر كـل شعبـه ربوعـه
واليوم يااهل الدار وانتـم تصلـون=ادعوا لشيـخٍ قـل بالنـاس نوعـه
وحقٍ على الشعار بالشعر يرثـون=شيخٍ ملكنـا باالغـلا مـن طبوعـه
عسى البقا بإخوان مريـم ويبقـون=للـدار حكـامٍ وحـنـا دروعــه
آل الصبـاح وغيرهـم مايحكمـون=صغيرهم يامـر ونمشـي بطوعـه
ماني بمادحهـم لاجـل لايقولـون=شاعر ويرجى من وراهـا متوعـه
يكفي محبتنـا لهـم حـب بجنـون=ومن بيننا مافيـه بغـض وقطوعـه


سعود الردعان الهاجري

[/poet]

[poet font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""]

لا اله الا انت يا محيـي العشـب الهميـد =
مجـري الافـلاك فالكـون رب الكاينـات

هكذا الدنيـا بهـا راحـل ونـازل جديـد =
ما يخلـد شخـص والباقيـات الصالحـات

الـبـقـا لله والله ويـفـعـل مـايـريـد =
والفنا للعبـد لـو طالـت سنيـن الحيـات

ما جزع من حكمتـك كـود رجـالٍ بليـد =
لا اعتراض وكل نفـسٍ يوافيهـا الممـات

المصيبه حجمها اكبر من حروف القصيـد =
الاجـل محـتـوم يالله تلهمـنـا الثـبـات

المصيبه جابـر الخيـر والـراي السديـد =
جابر العثرات رمـز الوفـا والمعجـزات

جابر اللي كـل مـا زادت الشـده يزيـد =
لين بامـر الله تهـون الامـور الكايـدات

يوم سلبـت دارنـا ردهـا بـرايٍ رشيـد =
ردها بحكمه وقـوه مـن ايديـن الطغـات

مـا تخـاذل عنهـا والله لفـعـل شهـيـد =
ما استراح ولا اهتنا ليـن شتتهـم شتـات

ما ذخر بالمـال حطـه لنـا كلـه رصيـد =
لجل ما نحتاج للغيـر فـي كـل الجهـات

سيف عدل وراس حكمٍ مع حصـنٍ مجيـد =
وساس مجدٍ ما تزعزعه كبـر المعظـلات

قـاد نهضتنـا بحكمـه و بالبـاس الشديـد=
لين ما رسا السفينه على شاطـي النجـات

حط عينه من وراهـا كمـا السـد الجويـد =
وعينه الاخرى على الشعب محمود الصفات

كل همـه يشـوف شعبـه بالدنيـا سعيـد =
لا هتنا شعبه اهتنـا جفـن عينـه بالمبـات

احتوا شعبـه بحبـه مـن قريـب وبعيـد =
وبادلـه شعبـه وحقـق جميـع الامنيـات

منهـو اللـي مثـل جابـر بالدنيـا زهيـد =
زاهـدٍ عابـد وناسـك وحافـظ للصـلات

يالله انـي طالبـك تشملـه يـوم الوعيـد =
رحمتك يوم الخلايق تحت امـرك عـرات

عظـم الله اجرنـا مـا بعـد جابـر فقيـد=
ويالله انـك ترزقـه بالجنـان الـبـاردات

حسن عبدالله الوطري

[/poet]

في رثاء أمير القلوب رحمه الله

خمسة عشر . . واحد تعاليل وأحزان=ألفين وستة من سهوم المقادير
الدار صاحت ردد الاّه " دسمان"=ننعي أمير قلوبنا جابر الخير
حل الأجل فجر الأحد قبل الاّذان=هلت دموع الشعب مثل الشخاتير
الموت بأمر الله يجي وين ماكان=يقبض على الأرواح مافيه تأخير
أي والله نبكي شيخنا عالي الشأن=ياعل عين(ن) مابكت للتعازير
محبته ماهي دعايات وإعلان=لأبو مبارك حب فاق التصاوير
قايد مسيرتنا بنهضة وعمران=أبذل جهودة ماحصل منه تقصير
حكيم وأحكامة بحجة وبرهان=له رأي لامن صار بالوضع تعكير
ناصر قضايا أمتة قدر الأمكان=فعله عليه أشهود ماهو بتزوير
لاعودت للحق في كل ميدان=حنكة سياسية لها وقع تأثير
يوم الكوارث زلزلت بعض الأوطان=ماصد عنها مدها بالدنانير
راح الأمير الصيرمي ذرب الايمان=أنشهد أنه من كبار المخاسير
مرحوم ياقايد شمل دار هدلان=أرض الكويت اللي تلم المسايير
مرحوم يابحر الندى يابليهان=نسل الصباح الحر شيخ المناعير
مرحوم يارمز التواضع والإحسان=مرحوم يافال السعد والتباشير
عساك بالفردوس مع حور الاعيان=اّميين ياربي عليك التدابير

مناور بن هاجد العازمي

[poem=font="Arial,5,,bold,normal" bkcolor="transparent" bkimage="" border="double,4," type=2 line=1 align=center use=ex num="0,black"]
الأحـد جانـا بوقـت الرابعـه=صبح يوم ٍ للكويتـي اسـودي

في شهر واحد والامّه متابعـه=ستّه وألفيـن عـام ٍ سرمـدي

في وفاة الشيخ جابـر فاجعـه=الأميـر اللّـي بدربـه نقتـدي

من خبر موته عيونـي دامعـه=ولا اهتنينا في شراب ومرقدي

الحزن عمّ الكويـت وشارعـه=من قصر دسمان حتّى الأحمدي

والامم تنكس علمهـا راكعـه=والدول تنعي غياب الاجـودي

اشهد أن الموت محد ٍ مانعـه=عظّم الله اجرنـا فـي سيّـدي

يا قلـم ورّد بوسـط الطابعـه=عن مشاعر شعب واحزان بلدي

شعبه اللـي بالمحبـه بايعـه=ما نسى المعروف والكف الندي

له حروف الشعر تقبل طايعـه=وله قوافيها تحـن وترعـدي

ذاك جابر كل طيـب ٍ جامعـه=والكرم في ذروته بـه يبتـدي

لأجل داره كل مجـد ٍ صانعـه=ولأجل شعبه كل خير ٍ يـاردي

مدّته تمـلا البطـون الجايعـه=ولخدمة المسكين دايم يجهـدي

بالكـرم يمنـاه دايـم بارعـه=ومن وصل بابه بطيبه يسعدي

حكمته تهدي ضعيف الرابعـه=ولأجل شعبه كل غالي يفتـدي

رايه يقدّي للأريـاء الضايعـه=كم يغيث وكم يعيـن وينجـدي

كـل درب ٍ للمراجـل تابـعـه=مثل نجم سهيل يسطع والجدي

بال***** كـل حاقـد قامعـه=وبالفطانـه رد كيـد المعتـدي

شامخ ٍ مثل النّجـوم اللامعـه=مات وكلن في صلاحه يشهدي

مات وحبّه وسط شعبه زارعـه=بالقناعه ما احتدينا لـه حـدي

والقلوب ابحكـم ربّـي قانعـه=والقدر لازم على النّاس يعـدي

ذي عقيدتنـا ومنّـه نابـعـه=ولولا توفيقه أبد مـا نهتـدي

يا إلآه ٍ كـل شـيء ٍ سامعـه=وأنت في عرشك ولا لك مسندي

جل شانك عـن ايـاد ٍ طامعـه=من على المكروه غيرك يُحمدي

نطلبك وقلوبنـا لـك خاضعـه=ولا حد ٍ غيرك إلاهـي نعبـدي

روح ابومبارك لوجهك راجعـه=جعله بجنّات عـدن ٍ يسعـدي

وجابر الأحمد صعيب موادعـه=الاميـر اللّـي معانـا مخلـدي

ولونزيد الحرف وسط الطابعـه=ما لحقنا حزننـا فـي سيـدي [/poem]



::::::::::::::::::::::
وسلامتكم

(( .. اخوكم / حسن بن علي الهاجري .. ))

رحم الله الشيخ جابر وتجاوز عنه


وجزاكم الله خيراً جميعاً على المشاركة في الموضوع

الاخ العزيز سعيد الحمالي


جزاك الله خير ورحم الله الشيخ جابر رحمة واسعه


تقبل ودي وتقديري

سعيد الحمالي .. وافي دائماً

بيّض الله وجهك أخي ورحم الله الشيخ جابر رحمه واسعه

لاهنت